Во денешната кујна нашата Виолета ни подготви интересен и мноогу вкусен десерт, кој лесно може да си го приготвите и вие - киндер пингвин коцки.
Еве што се е потребно и како се приготвуваат:
За пандишпан:
6 јајца (одвоено белки и жолчки)
6 лажици шеќер
6 лажици брашно
1 прашок за пециво
6 лажици врела вода
3 лажици какао
За крем:
250 гр маскарпоне
5 лажици шеќер во прав
500 мл слатка павлака
1 желатин
За чоколаден крем:
100 гр чоколадо
50 гр путер
1 лажица масло
50 мл вода
За глазура:
100 гр чоколадо
50 гр путер
1 лажица какао
Подготовка:
Жолчките изматете ги заедно со шеќерот и врелата вода. Измешајте ги какаото, брашното и пецивото во посебен сад и додадете ги во изматените жолчки лажица по лажица.
На крај изматете ги белките со прстофат сол и тие додадете ги во жолчките.
Печете во голем плех од шпорет обложен со хартија за печење на 175°С околу 25 минути.
Сечете на два еднакви дела.
Во меѓувреме подгответе го кремот.
Желатинот прелијте го со 4 лажици вода да набабри. Изматете го маскарпонето со шеќерот во прав и додадете ја веќе изматената слатка павлака. Желатинот стоплете го на ниска температура, па потоа додавајте го во смесата.
За чоколадниот крем потребно е чоколадото ситно да го исечкате, а во посебен сад да го загреете путерот со маслото и водата. Кога течноста ќе се соедини, тргнете од оган и додадете го чоколадото. Мешајте додека не се растопи.
Глазурата ќе ја подготвите така што на тивок оган ќе го загреете какаото со путерот додека не добиете еднолична смеса и додадете го чоколадото.
Но глазурата правете ја на крај, затоа што треба да е топла кога ќе ја прелиете.
Редење на слоеви:
Прво се става половината од пандишпанот и се премачкува со половина од кремот.
Над кремот ставете го чоколадниот крем и оставете го да се излади во фрижидер 15 минути.
Откако се излади, ставете ја другата половина од кремот па покријте со втората половина од пандишпанот.
Прелијте со топла глазура и оставете го колачот во фрижидер неколку часа.
Сечете на коцки...
Преубав десерт кој вреди да се направи.
На здравје!