Годинашното издание на Поетската ноќ во Велестово ќе биде посветено на поезијата на Иван Џепароски и на цртежите на Воскресија Андреевска, а по пауза од една година, љубителите на пишаниот збор повторно ќе уживаат и во интернационалната вечер со поети - гости од Бугарија и Република Ирска.
31-то издание на Поетска ноќ во Велестово ќе биде отворено на 16-ти август во 21.00 часот пред чешмата во Велестово, Охрид, со настап на вокалистката Евгенија Здравевска (Зарина Првасевда) и Александар Петров како специјална придружба на тапан. Програмата ќе ја води Марина Димовска.
Годинешното издание на ПНВ е посветено на поезијата на Иван Џепароски, а за неговото поетско творештвоза ќе беседи проф. д-р Наташа Аврамоска. Стиховите ќе ги интерпретира актерот Владимир Јачев.
Во 22.00 часот во тремот на црквата „Успение на Св. Богородица“ во Велестово ќе биде отворена изложбата на академскиот сликар Воскресија Андреевска.
На 17-ти август од 12.00 часот во НУ Библиотека „Григор Прличев“ во Охрид ќе се одржи настанот „Поезија напладне“ посветен на творештвото на Поли Муканова од Бугарија, а модератор ќе биде Зоран Јакимоски.
Истиот ден од 19.30 часот во Кафе бар „Шила“ во Охрид ќе биде одржана и промоцијата на стихозбирката „Жалба до Музата“ од Џери Марфи (Република Ирска), избор и препев на Јулијана Величковска, а во издание на ПНВ Публикации од Скопје. Промотор ќе биде проф. д-р Димитар Пандев, а стиховите на македонски ќе ги чита актерот Јован Цветкоски.
На 18-ти август од 20.30 часот во Куќата на Уранија, МАНУ – Охрид во соработка со Фондација „Славко Јаневски“ ќе биде претставен добитникот на наградата „Роман на годината“ за 2018 г. Николина Андова Шопова и романот „Некој бил тука“.
Годинава манифестацијата е поддржана од Министерството за Култура, Општина Охрид и Комерцијална Банка.