Младата поетеса Ива Дамјановски за книгата „Двоумење“ (Издание на ПНВ Публикации)“ е годинашен добитник на најпрестижната поетска награда „Браќа Миладиновци“, што Струшките вечери на поезијата ја доделуваат за најдобро поетско издание меѓу два фестивала.
За наградата одлучуваше жири комисијата во состав: Ангелина Бановиќ Марковска – претседател, Анастасија Ѓурчинова, Соња Стојменска Елзесер, Душко Крстевски и Никола Маџиров – членови.
– Ако изминатава година, во поетската продукција на македонски јазик има нешто што може да ја понесе толку употребуваната, дури и излитена синтагма „книжевен настан“, тогаш според мислењето на жири-комисијата за доделување на наградата „Браќа Миладиновци“, тоа секако е книгата на младата Ива Дамјановски. Како хабитус на една нова генерација, а во исто време и сензибилност која е безвременска, како музикалност и интермедијалност која вибрира на рабовите на поетскиот израз којшто се повеќе се втурнува кон другите уметности, ова книга е доказ и показ дека македонскиот јазик е сочен, жив и квалитетен материјал од кој може да се изградат песни кои се стимулативни и за уво, и за срце, и за мисла – стои во одлуката за националната поетска награда „Браќа Миладиновци“.
Радоста е дотолку поголема што наградата ја доби еден од нашите млади автори, затоа што еден од темелите на нашата работа е токму работењето со младите таленти и дебитантите.
Оваа награда е поттик да продолжиме понатаму, да им даваме шанси на новите гласови, кои ја создаваат најновата македонска литература, за што доказ е и оваа награда, најпрестижната награда за поезија во Македонија! -ни изјави Јулијана Величковска од ПНВ Публикации.