Во црквата Св.Димитрија во с.Велгошти денес се плетеа венци од цвеќиња за претстојниот празник Митровден.
Жени, жителки на Велгошти, со своите вредни раце направија цветни венци и го украсија црковниот двор, но и внатрешноста, по повод претстојниот празник Митровден.
Митровден е голем христијански празник посветен на светиот великомаченик Свети Димитриј, кој се празнува на 8-ми ноември. Традиционално, празникот го означувал почетокот на студеното време (зимата). Празникот се одбележува со носење леб и вино во црква каде се осветува лебот, а се слави и со семејството и блиските. Вечерта пред празникот се прави `заслуг`, при што поблиските се канат со лепче на слава. На денот на славата се дава ручек од мрсни јадења, освен ако празникот е во ден кога се пости. Сите луѓе кои се викаат Димитар, Димитрија, Диме, Митре, на овој ден слават именден кој се прави навечер.
Според народните верувања и обичаи, се сметало дека времето по Митровден е лажливо, односно дека зимата може во секој момент да изненади, па затоа се зацврстило мислењето дека лоша среќа е ако нешто се одложи да се заврши по големиот празник. Митровден бил показател каква ќе биде зимата – ако денот бил сончев, се верувало дека зимата ќе биде блага, со мал број студени денови. Ако на Митровден паднело снег, се верувало дека ќе трае до април.